Халқаро футбол федерацияси (ФИФА) ташкилот кенгашида қабул қилинган қарорларни эълон қилди.
ФИФА матбуот хизмати хабарига кўра, 17 ёшгача бўлган футболчилар ўртасидаги футбол бўйича жаҳон чемпионати 48 та жамоага кенгайтирилади ва ҳар йили (илгари ҳар икки йилда бир марта) ўтказилади.
2025 йилдан бошлаб ёшлар ўртасидаги жаҳон чемпионати Қатарда бўлиб ўтади. Ушбу режа 2029 йилгача беш йилга мўлжалланган. Ёш аёллар ўртасидаги жаҳон чемпионати 24 та жамоага кенгайтирилади ва ҳар йили Марокашда ўтказилади.
ФИФА шунингдек, 2027 йилги аёллар ўртасидаги жаҳон чемпионати ўтказиладиган жой ташкилотнинг май ойида бўлиб ўтадиган навбатдаги Конгрессида аниқланишини тасдиқлади. Бразилия, Бельгия/Германия/Нидерландия (биргаликда), шунингдек, АҚШ/Мексика мезбонлик ҳуқуқи учун курашмоқда.
