Мадриднинг “Атлетико” клуби ҳужумчиси Антуан Гризманн тўпиғидаги муаммолар туфайли март ойида Франция терма жамоасига ёрдам бермайди. RMC Sport хабарига кўра, одатда терма жамоада майдон марказида тўп сурадиган Гризманнинг ўрнига "уч ранглилар" сафига ярим ҳимоячи Маттео Гендузи чақирилади.

Шу тариқа Гризманнинг ақл бовар қилмайдиган серияси тугайди – у Франция терма жамоасининг сўнгги 84 ўйинининг ҳар бирида майдонга тушганди. Охирги марта "уч ранглилар" 2017 йилнинг июнь ойида Гризманнсиз ўйин ўтказган. Ўшанда Антуан Англияга қарши ўртоқлик учрашувида 90 дақиқа захира ўриндиғида ўтирганди.

Эслатиб ўтамиз, ёзда Франция терма жамоаси 2024 йилда Германияда бўлиб ўтадиган Европа чемпионатида иштирок этади.