Марокаш 2030 йилги жаҳон чемпионати учун қуришни режалаштирган янги стадион лойиҳасини тақдим этди.
The Sun нашрининг ёзишича, стадион "Гранд Стад де Касабланка" деб номланади. Арена трибуналари 115 минг томошабинга мўлжалланган бўлиб, бу дунёдаги бошқа стадионлардан кўп. Стадион Ал-Мансурия шаҳрида қурилади.
Марокашликлар ушбу стадион қурилиши билан 2030 йилги жаҳон чемпионати финалини ўтказиш ҳуқуқини қўлга киритмоқчи. Испания томони ҳам финални Мадрид ёки Барселонада ўтказишга умид қилмоқда.
Эслатиб ўтамиз, футбол бўйича жаҳон чемпионати илк бор уч қитъада ва олтита давлатда ўтказилади. 2030 йилги жаҳон чемпионатидаги аксарият ўйинлар Марокаш, Испания ва Португалияда ўтказилади.
Жанубий Америкада учта ўйин бўлиб ўтади. Очилиш ўйини Уругвайда бўлиб ўтади ва маҳаллий терма жамоа иштирок этади.
Худди шу нарса Аргентина ва Парагвай терма жамоаларининг гуруҳдаги дастлабки ўйинларига ҳам тегишли - улар ўз ватанларида очилиш ўйинларини ўтказишади.
