Ливан миллий терма жамоаси бош мураббийи Тео Буккер терма жамоа футболчисини ўйин сотганликда айблади. Ҳимоячи Рамиз Даюб ва ҳужумчи Маҳмуд ал-Алининг аппеляцияси кўриб чиқилганидан кейин улар умрбод футболдан четлаштирилишди.

Жумладан, ушбу футболчиларнинг хатти-ҳаракатлари Қатарга қарши ўйинда шубҳа уйғотган. Бу ўйинда қатарликлар 1:0 ҳисобида ғалаба қозонишган. "Биз Қатарга қарши ўйинда яхши ўйин кўрсатдик. Аммо кутилмаганда рақиб футболчиси дарвозабонимиз билан бирга-бир вазиятга чиқиб кетди. Ушбу вазиятда ҳимоячи оёғи шол бўлиб қолганга ўхшайди. Қайсидир футболчи ўйинни сотиши, ўз мамлакатини сотиши мумкинлиги ҳақида ўйлаб кўрмаган эдим", дейди германиялик мутахассис. "

Ўйиннинг видеолавҳасини кўриб чиққанимда, ҳимоячи рақиб ҳужумчисига гол уриш учун ёрдам бериб юборгани менга шубҳали туюлди. Аввалига бу ҳақда менда ҳеч қандай исбот йўқ эди. ҳимоячи ўйин босимини кўтара олмаган деб ўйлагандим", дейди Тео Буккер.

Рамиз Даюб ва Ал-Али ўзларига қўйилаётган айбловни рад этишга уринишмоқда. "Бу жиддий айблов, у ҳеч қандай асосга эга эмас. Агар ҳақиқатан ҳам мен айбдор бўлсам, вазиятни ФИФА ўрганиб чиқиши ва менга нисбатан чора кўриши мумкин, Ливан футбол ассоциацияси эмас", дейди ҳимоячи Даюб.

Ушбу ҳолатни қуйида томоша қилишингиз мумкин!