"Арсенал" ва "Тоттенхэм" ёзда "Ньюкасл"нинг 24 ёшли ҳужумчиси Александр Исаакни сотиб олиш учун 100 миллион фунт (117 миллион евро) таклиф қилишга тайёр. Бу ҳақда The Sun хабар бермоқда.
Манбага кўра, "Ньюкасл" бош мураббийи Эдди Хау швециялик футболчининг жамоани тарк этишини истамаяпти. Бироқ, Исаакни сотиш клубнинг амалдаги молиявий фэйр плей қоидаларига риоя қилишдаги қийинчиликлари туфайли зарур бўлиши мумкин. Агар "Ньюкасл" кейинги мавсумда Европа мусобақаларида иштирок эта олмаса, бу масала айниқса долзарб бўлиб қолади.
Эслатиб ўтамиз, жорий мавсумда Исаак барча турнирларда 31 та ўйинда қатнашиб, 18 та гол ва битта голли узатмани амалга оширган. Футболчининг клуб билан амалдаги шартномаси 2028 йилнинг ёзига қадар амал қилади.
