Жорий мавсумда "Брайтон"да ижара асосида ўйнаётган "Барселона" вингери Ансумане Фати Каталония клубининг кейинги мавсумдаги режаларига кирмайди.

Испаниянинг Sport нашри хабарига кўра, "Барселона" раҳбарияти футболчини келаси мавсумда жамоада қолдирмасликка қарор қилган.

Шунингдек, испан клуби раҳбарияти футболчи жорий мавсум ижара асосида тўп тепаётган "Брайтон" ижара шартномасини узайтирмоқчи эмаслигини билиши ҳам хабар қилинган.

Фати ва футболчининг атрофидагилар ижарадан сўнг футболчи "Барселона"га қайтишини режалаштиришган. Клуб футболчини сотишга тайёр, бироқ трансфер бозорида футболчига бўлган талаб минимал бўлишини тушунади.

21 ёшли испаниялик вингер учун фаолиятини давом эттиришнинг асосий варианти - Ла Лига клубига ижарага бериш. Аммо футболчини ижарага олмоқчи бўлган ҳеч бир клуб Фатининг маошини тўлиқ тўлашга тайёр эмас. "Барселона" бу суммани қисман қоплаши керак бўлади.

Фатининг Каталония клуби билан шартномаси 2027 йилнинг ёзига қадар тузилган.

Жорий мавсумда Фати “Брайтон” сафида 23 та ўйинда майдонга тушиб, 4 та гол урди ва 1 та голли узатмани амалга оширди.