«Андижон» Суперлиганинг 5-турида Тошкентда «Локомотив»ни 1:2 ҳисобида мағлубиятга учратди.

Учрашувда захирадан майдонга туширилган тожикистонлик ҳужумчи Шаҳром Самиев иккинчи голга муаллифлик қилди ва чемпионатимиздаги голлари ҳисобини очди. Футболчи «Андижон» матбуот хизматига ўз фикрларини айтиб ўтди.

— Шаҳром, «Локомотив»га қарши баҳс тўғрисида нима дея оласиз?

— Ўйин яхши ва эмоцияларга бой тарзда ўтди. Жамоадошларимга раҳмат, охиригача ҳисобни ушлаб туришди ва мухлисларга катта рахмат. Улар энг зўри!

— «Андижон» сафидаги биринчи голингизни урдингиз. Ҳиссиётлар қандай?

— Ғалабадан жуда мамнунман. Жамоанинг ютуқларига ўз ҳиссамни қўшганимдан хурсандман ва бизда аҳил бир оила мужассам.

— Захирадан майдонга тушиб ўйинни кучайтиришда ҳисса қўшяпсиз ва гол уряпсиз. Сизни «яширин қурол» деб атасак бўладими?

— Нима десам экан, мен доим жамоага ёрдам беришга тайёрман. Асосий таркибдами ё захираданми, фарқи йўқ. Яширин қурол хақида хеч нарса дея олмайман (кулади).

— Голингизни кимга бағишладингиз?

— Голни бизни «зига зага», “олға «Андижон», деб қўллаб-қувватлаган мухлисларимизга бағишлайман.