"Челси" бош мураббийи Маурисио Почеттино Англия чемпионатининг 33-туридан ўрин олган "Эвертон"га қарши ўйинда футболчилари ўртасидаги пенальти тепиш ҳуқуқи учун кураш ҳақида гапирди.
“Палмер пенальти тепувчи. Бу бошқа такрорланмайди, улар яна болалар каби ҳаракат қила олишмайди. Бу шармандалик. Мен футболчиларга бундай хатти-ҳаракатни охирги марта кечиришимни айтдим. Мен ҳазиллашаётганим йўқ. Яна, бир марта қайтараман. Коул Палмер - пенальти тепувчимиз", - дея Почеттинонинг сўзларини келтиради журналист Фабрицио Романо.
Эслатиб ўтамиз, 62-дақиқада Лондон клуби пенальти тепиш ҳуқуқини қўлга киритди. Николас Жексон ва Нони Мадуэке Коул Палмер пенальтини амалга оширмоқчи бўлганидан норози эди. Жексон тўпни Палмердан тортиб олмоқчи бўлди, бироқ инглиз уни туртиб юборди.
