Кечаги мағлубиятдан сўнг "Навбаҳор"га мавсумдаги илк очкони қўлга киритиш ҳали бери насиб қилмайдиганга ўхшаб қолмоқда...

Чемпионатнинг яққол аутсайдери сифатида эътироф этилган "Сўғдиёна" кеча аутсайдерларга хос ўйин кўрсатмади. Футболчиларнинг ўзига бўлган ишончи якунда ўз самарасини берди. "Навбаҳор"дачи? Футболчилар ҳаракат қилишди, бу аниқ. Лекин яратилган имкониятлардан унумли фойдалана оладиган ўйинчи топилмаяпти. Ғайрат Жўраевнинг ҳисобида сўнгги икки ўйиндан сўнг 3 та голни кўришимиз мумкин эди. Бироқ Жўраевга ҳужумчиларга хос характер етишмаяпти.

Жамоамиз навбатдаги икки ўйинни ўз майдонида ўтказади. 30 март куни "Насаф" меҳмон бўлса, 3 апрел санасида 2-турнинг қолдирилган учрашувида "Локомотив"ни қабул қиламиз. Рақибларимиз кучли. Тан оламиз. Аутсайдерларга имкониятни бой берганимиздан сўнг бу жамоаларни мағлуб этиш бир чеккада турсин, ҳатто улардан очко олишимизга ҳам ишониш қийин. Кечаги мағлубиятга сабаб қилиб Мустафо Байрамов Меҳмоновнинг майдондан четлатилганлигини кўрсатибди. Лекин 51-дақиқага қадар учрашувда "Навбаҳор"нинг устунлиги кузатилмади. Гол бўлмаганда ҳам мезбонлар устунликка эга бўлишаётганди. Биз ҳақиқаттан ҳам "Сўғдиёна"дан кучли эмасга ўхшаб қоляпмиз! Очиғини айтганда, янги мавсумдан кўп нарсаларни кутгандик. Афсуски, яна ўша эски ҳолат...

"Насаф" билан учрашувгача олдимизда анча вақт бор. Шу вақт оралиғида Усмон Асқаралиев жамоада катта ўзгаришларни амалга ошириши лозим. Асосийси таркибни тўғри танлаш лозим. Ҳозирча мусобақа жадвалида 11-поғонани эгаллаб турибмиз. 2-тур ўйинлари ўз вақтида ўтказилганда балки аҳволимиз бунданда ёмон бўлиши ҳам мумкин эди. Аммо барибир "Локомотив" билан ўйнаймиз.

Улуғбек АБДУЛЛАЕВ