Буюк Британиянинг икки машҳур промоутерлик компанияси Matchroom ва Queensberry биргаликда собиқ жаҳон чемпиони иштирокидаги ушбу жангни эълон қилди.
Унга кўра, 1 июнь куни Саудия Арабистони пойтахти Ар-Риёд шаҳрида ўтказиладиган проф бокс оқшомида супероғир вазнда собиқ жаҳон чемпиони, америкалик Деонтей Уайлдер (43-3-1, 42 KO) хитойлик Чжан Чжилэй (26-2-1, 21 KO)га қарши рингга кўтарилади.
Маълумот учун, 38 ёшли Деонтей Уайлдер сўнгги жангини ўтган йилнинг декабрь ойида Янги Зеландия вакили, собиқ жаҳон чемпиони Жозеф Паркерга қарши ўтказиб, ҳакамларнинг якдил қарори билан рақибига ютқазиб қўйганди. 40 ёшли Чжан Чжилэй эса шу йилнинг мартида айнан Паркерга очколар бўйича имкониятни бой берган эди.
Эслатиб ўтамиз, 1 июнь кунги профессионал бокс оқшомининг марказий жанги яримоғир вазн (79,4 кг.гача) тоифаси мутлақ жаҳон чемпионлиги учун россиялик боксчилар Дмитрий Бивол ва Артур Бетербиев ўртасида бўлиб ўтади.
