"Манчестер Сити" билан ўйин Карло Анчелотти учун "Реал" бошқарувидаги Чемпионлар лигасидаги 60-ўйин бўлди.
Чемпионлар лигаси 1/4 финалининг иккинчи ўйинида “Манчестер Сити” ўз майдонида “Реал Мадрид”ни қабул қилди (1:1, пенальтилар - 3:4). Дастлабки ўйинда жамоалар 3:3 ҳисобида дуранг ўйнашганди.
Карло Анчелотти учун бу ўйин унинг асосий еврокубок турнирида Мадрид клуби бошқарувидаги 60-ўйини бўлди.
Шу тариқа, “Реал Мадрид”нинг амалдаги бош мураббийи бу кўрсаткич бўйича Винсент дель Боске билан тенглашиб олди.
Биргина Мигель Муньос Европа кубоги/Чемпионлар лигасида Мадрид клуби бошқарувида кўпроқ ўйин ўтказган - 1959-1974 йиллар оралиғида 71 та ўйин.
Бундан ташқари, Карло Анчелотти Чемпионлар лигасида мураббийлик фаолиятидаги 201-учрашувини ўтказмоқда. У тарихда биринчи бўлиб 200 та ўйинга эришган.
