Чемпионлар лигаси нимчорак финал жавоб ўйинида “ПСЖ”дан учралган мағлубият (1:4) Хави жамоасидаги муҳитга жиддий таъсир қилди. Ўтган мавсумда "Манчестер Сити" билан треблга эришган Илкай Гюндоган турнирни тарк этишни энг аламли қабул қилди.
Ўзи нима бўлди?
Пеп раҳбарлигида ўтказган йиллар давомида ғалаба қозониш менталитетини шакллантирган немис “Барса”ни ўн киши бўлиб қолишга сабабчи Рональд Араухони омма олдида танқид қилди.
"Бундай вазиятларда тўп учун курашга кирганингизда, ўзингизга ишончингиз комил бўлиши керак. У тўпга тегдими ёки йўқми, билмайман. Лекин мен бундай вазиятни қоида бузгандан кўра гол ўтказиб юборишни афзал кўраман. Ўйин бошида қизил карточка ўйинни ўлдиради”, деди Гюндоган. Араухо германиялик ярим ҳимоячининг гапига шундай жавоб қайтарди: “Мен ўз фикрларимни ўзимда сақлашни афзал кўраман. Менинг ҳурмат қилиниши керак бўлган принциплар ва қадриятларим бор".
Испания матбуотига кўра, ушбу оммавий қарама-қаршиликдан сўнг жамоа икки лагерга бўлинган: кимдир Гюндоганни, бошқалари Араухонни қўллаб-қувватламоқда. Хави кескин вазиятни бартараф этиш учун пайшанба кунги машғулотларни ҳам бекор қилишга қарор қилди. Базага фақат тиззасидаги оғир жароҳатдан тикланишда давом этаётган сардор Серхи Роберто, Педри ва Гави етиб келишди.
Гюндоган учун бундай танқид одатий ҳол. Бу ҳақда унинг ўзи гапирди
2023 йил октабр ойида Гюндоган “Барса” футболчиларини “Реал”дан 1:2 ҳисобидаги мағлубиятга муносабат билдиргани учун ҳақорат қилди: “Мен бу ерга бундай ўйинларда мағлуб бўлиш учун келганим йўқ. Кийиниш хонасида кўпроқ ғазаб ва умидсизликни кўришни истардим".
Кейин Хави бу сўзларни ижобий қабул қилди, аммо Гюндоганнинг қўполлиги футболчиларга ёқмади. Ярим ҳимоячи буни тушунтириши керак эди: "Сити"да муваффақиятсиз ўйинлардан кейин бундай танқид одатий ҳол деб ҳисобланган, шунинг учун мен учун бу одатий ҳолдир".
“Эль-класико”дан олдин вазият нормаллашадими?
Mundo Deportivo хабарига кўра, Гюндоган ҳеч кимни хафа қилгиси ёки айблагиси йўқ, фақат исм-шарифларни айтмасдан йўл қўйилган хатоларни таъкидламоқчи бўлган.
Ярим ҳимоячи можарони ҳал қилиш учун Араухо билан гаплашишга ҳаракат қилади. "Барса" матбуот хизмати Илкайдан бўлиб ўтган воқеа тафсилотлари билан батафсил интервю беришни сўраши мумкин.
"Реал Мадрид" билан муҳим ўйин олдидан каталонияликларда парокандалик бор. Ҳозир Хавига ҳавас қила олмайсиз. Мадридликлар билан турнир жадвалидаги фарқ саккиз очкони ташкил этади ва мағлубиятга учраган тақдирда чемпионлик учун имконият минимал даражага тушади.
"Барса" президенти Жоан Лапорта ҳам келаси ҳафта мураббий билан учрашиб, уни клубда қолишга ишонтиришга ҳаракат қилади. "ПСЖ" билан ўйинда жуда асабий кўринган 44 ёшли мутахассис кетиш ҳақидаги қарорини ўзгартиришига ишониш қийин.
