Chempionlar ligasi nimchorak final javob o‘yinida “PSJ”dan uchralgan mag‘lubiyat (1:4) Xavi jamoasidagi muhitga jiddiy ta’sir qildi. O‘tgan mavsumda "Manchester Siti" bilan treblga erishgan Ilkay Gyundogan turnirni tark etishni eng alamli qabul qildi.
O‘zi nima bo‘ldi?
Pep rahbarligida o‘tkazgan yillar davomida g‘alaba qozonish mentalitetini shakllantirgan nemis “Barsa”ni o‘n kishi bo‘lib qolishga sababchi Ronald Arauxoni omma oldida tanqid qildi.
"Bunday vaziyatlarda to‘p uchun kurashga kirganingizda, o‘zingizga ishonchingiz komil bo‘lishi kerak. U to‘pga tegdimi yoki yo‘qmi, bilmayman. Lekin men bunday vaziyatni qoida buzgandan ko‘ra gol o‘tkazib yuborishni afzal ko‘raman. O‘yin boshida qizil kartochka o‘yinni o‘ldiradi”, dedi Gyundogan. Arauxo germaniyalik yarim himoyachining gapiga shunday javob qaytardi: “Men o‘z fikrlarimni o‘zimda saqlashni afzal ko‘raman. Mening hurmat qilinishi kerak bo‘lgan prinsiplar va qadriyatlarim bor".
Ispaniya matbuotiga ko‘ra, ushbu ommaviy qarama-qarshilikdan so‘ng jamoa ikki lagerga bo‘lingan: kimdir Gyundoganni, boshqalari Arauxonni qo‘llab-quvvatlamoqda. Xavi keskin vaziyatni bartaraf etish uchun payshanba kungi mashg‘ulotlarni ham bekor qilishga qaror qildi. Bazaga faqat tizzasidagi og‘ir jarohatdan tiklanishda davom etayotgan sardor Serxi Roberto, Pedri va Gavi yetib kelishdi.
Gyundogan uchun bunday tanqid odatiy hol. Bu haqda uning o‘zi gapirdi
2023 yil oktabr oyida Gyundogan “Barsa” futbolchilarini “Real”dan 1:2 hisobidagi mag‘lubiyatga munosabat bildirgani uchun haqorat qildi: “Men bu yerga bunday o‘yinlarda mag‘lub bo‘lish uchun kelganim yo‘q. Kiyinish xonasida ko‘proq g‘azab va umidsizlikni ko‘rishni istardim".
Keyin Xavi bu so‘zlarni ijobiy qabul qildi, ammo Gyundoganning qo‘polligi futbolchilarga yoqmadi. Yarim himoyachi buni tushuntirishi kerak edi: "Siti"da muvaffaqiyatsiz o‘yinlardan keyin bunday tanqid odatiy hol deb hisoblangan, shuning uchun men uchun bu odatiy holdir".
“El-klasiko”dan oldin vaziyat normallashadimi?
Mundo Deportivo xabariga ko‘ra, Gyundogan hech kimni xafa qilgisi yoki ayblagisi yo‘q, faqat ism-shariflarni aytmasdan yo‘l qo‘yilgan xatolarni ta’kidlamoqchi bo‘lgan.
Yarim himoyachi mojaroni hal qilish uchun Arauxo bilan gaplashishga harakat qiladi. "Barsa" matbuot xizmati Ilkaydan bo‘lib o‘tgan voqea tafsilotlari bilan batafsil intervyu berishni so‘rashi mumkin.
"Real Madrid" bilan muhim o‘yin oldidan kataloniyaliklarda parokandalik bor. Hozir Xaviga havas qila olmaysiz. Madridliklar bilan turnir jadvalidagi farq sakkiz ochkoni tashkil etadi va mag‘lubiyatga uchragan taqdirda chempionlik uchun imkoniyat minimal darajaga tushadi.
"Barsa" prezidenti Joan Laporta ham kelasi hafta murabbiy bilan uchrashib, uni klubda qolishga ishontirishga harakat qiladi. "PSJ" bilan o‘yinda juda asabiy ko‘ringan 44 yoshli mutaxassis ketish haqidagi qarorini o‘zgartirishiga ishonish qiyin.
