БАА миллий терма жамоасининг Ўзбекистонга қарши ўйинга тайёргарлиги ва рақиб жамоа аъзоларининг ўйин борасидаги фикрларини беришда давом этамиз. Жамоанинг кечаги машғулотига БАА Ёшлар ва спорт ишлари бўйича бошқармаси бошлиғи ёрдамчиси Абдулмухсин ад-Досарий ташриф буюрди.

Досарий футболчилардаги юқори кайфият ва жанговар руҳни кўриб хурсанд бўлганини таъкидлади.

"Бизнинг терма жамоага ишончимиз юқори. Биз бу жамоадан келажакда юксак натижалар кутяпмиз. Ўзбекистонга қарши ўйин эса Осиё кубогининг саралаш  босқичида муҳим аҳамиятга эга. Бу ўйинга нисбатан оптимистик назар билан қараяпмиз. Кўрфаз кубогидаги ғалабадан сўнг Амирлик аҳли футболчилардан яхши ўйин кутяпти. Бу эса футболчиларга қўшимча масъулият юклайди", дейди Досарий.

БАА футбол ассоциацияси вакили Носир Ямаҳий Ўзбекистонга қарши ўйинда қўлга киритиладиган 3 очко терма жамоа Осиё кубогининг финал босқичига чиқиш учун муҳим қадам бўлишини таъкидлаб ўтди.

"Ўзбекистон бизга қарши катта куч билан ўйнайди. Боиси, улар биринчи ўйинда ўз майдонларида очко йўқотишди. Улар йўқотилган очкони БАА билан ўйинда тўлдиришга ҳаракат қилишади. Ўзаро ўйинлардаги учрашувлар орқали биз рақибни яхши биламиз. Натижалар шуни кўрсатмоқдаки, устунлик биз томонда. Аммо Ўзбекистон ҳам ўз олдига фақат ғалабани қўяди", дейди Ямаҳий.

"Биз ушбу ўйинда мухлисларни стадионга чорлашамиз керак. Ушбу ўйинга бепул чипта тарқатилади. Стадион олдида, савдо марказларида, аҳоли гавжум жойларда чипталарни тарқатамиз. Футболга қизиқувчи ҳар бир одамни стадионга чорлаб, ўйингоҳни мухлислар билан тўлдиришимиз лозим. Стадион мухлислар билан тўлса, жамоамиз яхши ўйин кўрсатади. Биз буни Баҳрайнда бўлиб ўтган Кўрфаз кубоги пайтида кўрдик. Баҳрайндагидан фарқли равишда, Абу Дабидаги Муҳаммад бин Зайд стадионини тўлдиришимиз осон бўлади", дейди федерация масъули.