“Байер” кетма-кет иккинчи марта ўйиннинг сўнгги дақиқасида гол уриб, мағлубиятдан қутулиб қолди.

Хаби Алонсо шогирдлари Бундеслиганинг 31-тури доирасида ўз майдонида “Штутгарт” билан дуранг ўйнади (2:2). Ўйинга қўшиб берилган 6-дақиқада ярим ҳимоячи Роберт Андрих ҳисобни тенглаштирди.

30-тур ўйинида "доричилар" "Боруссия Дортмунд" билан ўйинда 90+7-дақиқада Ёсип Станишич томонидан киритилган гол эвазига дурангга эришганди.

Леверкузен клубининг мағлубиятсиз серияси жами 46 ўйиндан иборат бўлиб, 38 ғалаба ва 8 дуранг бор. Охирги марта улар 2023 йилнинг май ойида мағлубиятга учраган.

Шу билан бирга, "Байер" учта ўйиндан буён ғалаба қозона олмаяпти. 18 апрель куни Европа Лигасида “Вест Хэм” билан дуранг ўйнади (1:1), 21 апрелда эса чемпионатда “Боруссия Дортмунд” билан (1:1) муроса кўчасини танлаганди.

2 май куни немис клуби Европа лигасида “Рома”га қарши баҳс олиб боради.