УЕФА Ижроия қўмитаси Евро-2024да иштирок этувчи терма жамоаларда қайдномага киритиладиган футболчилар лимитини оширишга қарор қилди, деб хабар бермоқда спорт ташкилоти расмий сайти.
Энди жамоалар ўз аризаларига 26 нафаргача футболчини ўз кенгайтирилган таркибига киритишлари мумкин. Илгари жамоанинг максимал таркиби 23 нафар футболчидан иборат бўлар эди.
Қайд этилишича, мусобақа регламентига кўра, Евро-2024 мусобақаси учун жамоаларнинг якуний рўйхати турнир бошланишига етти кун қолганда, 7 июнга қадар Европа футболи бошқарув органига тақдим этилиши керак.
Европа чемпионати финал қисми ўйинлари 2024 йилнинг 14 июндан 14 июлига қадар Германияда бўлиб ўтади. Турнирга ўнта шаҳар мезбонлик қилади: Берлин, Дортмунд, Дюсселдорф, Франкфурт, Гелзенкирхен, Гамбург, Кёльн, Лейпциг, Мюнхен ва Штутгарт.
