«Динамо» клуби бош мураббийи Камо Газаров "Гулистон"га қарши кечган учрашувдан сўнг (0:0) ўз фикрларини билдириб ўтди.

«Бугунги ўйин қийин эмас, омадсиз ўтди. Ўйин бошидан тажрибалироқ футболчиларга имкон берган бўлсамда кейинчалик таркибни ёшларга ишонишга қаратдим. Бугун майдонда ҳаракат қилган ҳеч бир футболчига эътирозим йўқ. Улар қўлдан келгунча ҳаракат қилишди. Керакли вазиятларни фойдалана олмаганимиз учун аввалги ўйиндан сўнг ҳам айтган гапим яъни бизга ҳужум чизиғида аниқлик етишмади. Устига устак бугун Тўлиқ Мирзаев ҳам ўйин бошидан жароҳат олди ва мажбурий ўзгаришни амалга оширдик. Мирзаевни аҳволи эртага маълум бўлади. Киликович жамоада лидерликни қўлга олиши керак эди лекин ҳали жамоа билан тўлиқ киришиб кетгани йўқ.

Бизни «Олмалиқ»қа қарши қийин учрашув кутиб турибди ва бугун йўқотилган 2 очкони тиклашимиз керак. Ўйлайманки кейинги ўйинда ғалаба қозонамиз. Ўйиндан олдин техник машғулотлар ўтказдик ва бугун буни самарасини кўрмаганимиз рост. Очиғини айтсам икки ойда жамоа тузиш бу машаққатдир. Ундан ташқари захирамиз ҳам фақат ёшлардан иборатдир. Мен ишонаманки маҳаллий ёшларимиз бизни уялтириб қўймайди ва керакли натижани кўрсатади», дейди Камо Газаров.