Бутунжаҳон профессионал футболчилар ассоциацияларини ўзида бирлаштирган FIFPRO ташкилотининг Осиё-Океания тузилмаси 7-9 май кунлари Сингапурда ўзининг бош ассамблеясини ўтказди.
Унда ташкилотнинг Осиё ва Океания қитъаларида жойлашган аъзо уюшмалари билан бир қаторда қитъанинг етакчи лигалари вакиллари ҳам иштирок этди.
Бутун жаҳонда профессионал футболчиларнинг манфаатларини ҳимоя қиладиган мазкур ташкилотнинг бош ассамблеясида профессионал мусобақалар ва уларнинг иштирокчилари ўртасидаги муносабат, мусобақаларни режалаштириш ва ўтказишда футболчиларнинг соғлиги ва имкониятлари даражасини инобатга олиш, шунингдек футболчилар уюшмалари ва лигалар, шунингдек клублар ўртасидаги муносабатларни тўғри ва ўзаро ҳамкорликка асосланган ҳолда ташкил қилиш каби масалалар муҳокама қилинди.
Ассемблеяда Ўзбекистон футболчилари уюшмаси доимий иштирокчи сифатида қатнашган бўлса, FIFPRO бу сафар Япония Жей-Лигаси ва Ўзбекистон Профессионал футбол лигаси вакилларини ҳам таклиф этиб, Лигалар ва Футболчилар уюшмалари ўзаро муносабатлари ва иш фаолияти қандай йўлга қўйилгани хусусида тажрибалар билан ўртоқлашишни сўради.
ЎзПФЛ Ўзбекистон футболчилари уюшмаси билан ўзаро яхши муносабатларни йўлга қўйган ва уюшмадан футболчилар манфаатларини ҳимоя қилиш бўйича келиб тушадиган мурожаатларни ҳамиша ҳал этишда яқиндан кўмак кўрсатиб келяпти.
