Килиан Мбаппе мавсум якунида "ПСЖ"ни тарк этишини маълум қилди. Форвард ёзда "Реал" футболчисига айланиши деярли аниқ бўлиб улгурди.
Мадрид клуби катта эҳтимол Мбаппе билан шартнома имзолаганини Чемпионлар лигаси финалидан сўнг эълон қилади. Испаниянинг AS нашрининг ёзишича, Мбаппе "Реал"да "ПСЖ"дагига қараганда анча кам маош олади. Қайд этилишича, франциялик футболчининг Мадриддаги йиллик маоши 25 миллион еврони ташкил қилади. Бу солиқлардан кейинги миқдор.
"ПСЖ"га келсак, Лига 1 гранди Мбаппега ойига 6 миллион евро, яъни йилига 72 миллион евро тўлар эди. Бироқ, бу ерда миқдор солиқ имтиёзларисиз кўрсатилган.
Мбаппе маошини пасайтиради, аммо шунга қарамай, у жуда катта фарқ билан "Реал Мадрид"нинг энг кўп маош олувчи футболчиси бўлади.
