"Астон Вилла" дарвозабони Эмилиано Мартинес ўзига хос "ютуқ"ни қайд этди.
Жаҳон чемпиони бугунги “Ливерпуль”га қарши ўйиннинг 61-сониясидаёқ тўпни ўз дарвозасига киритиб юборди. BBC хабарига кўра, бу Англия Премьер-лигасида 2014 йилнинг апрелидан бери энг тез автогол бўлди. Бундан 10 йил муқаддам ўша пайтда "Эвертон"да ўйнаётган Антолин Алькарас "Саутгемптон" билан учрашувнинг 54-сониясида ўз дарвозасига гол урганди.
“Астон Вилла” омадсиз стартга қарамай, “Ливерпуль” билан ўйинда (3:3) дуранг қайд этишга муваффақ бўлди. Оқшом қаҳрамони Жон Дурант бўлди, у ўйин охирида захирадан майдонга тушиб, иккита гол урди.
