Осиё футбол конфедерацияси ва Осиё кубоги-2015нинг маҳаллий ташкилий қўмитаси мусобақанинг тақвимини тасдиқлади.

Унга кўра, Осиё кубоги 9 январь куни Мельбурнда бошланади ва 31 январь куни Сиднейда бўлиб ўтадиган финал баҳси билан якунига етади. Шунингдек, чемпионатга юқоридаги 2та шаҳардан ташқари Брисбан, Канберра ва Ньюкасл шаҳарлари ҳам мезбонлик қилади.

Маҳаллий ташкилий қўмита раҳбари Майкл Браун Осиё кубоги-2015 тақвимининг тасдиқланиши муҳим воқеа эканини таъкидлаб ўтди.

"Осиё кубоги Австралияда 3 ҳафта давомида бўлиб ўтади. Мухлислар 32та ўйиндан баҳраманд бўлишади ва турнирнинг энг кулминацион нуқтаси 31 январь куни бўладиган финал баҳси бўлади. Бешта шаҳарда, бешта стадион ўйинларни қабул қилиш учун тайёрлигидан хурсандман. Бу эса мусобақа тақвимини яхши тузиб чиқишга ёрдам беради", дейди Браун.

Брауннинг таъкидлашича, мезбонлар гуруҳ баҳсларини 9 январь куни Мельбурнда, 13 январь куни Сиднейда, 17 январь куни Брисбэнда ўтказади.