"Реал" ярим ҳимоячиси Арда Гюлер жамоага мослашиши ҳақида гапирди.
"Мен жамоага тўлиқ мослашдим. Мен клубдаги ҳамкасбларим, мураббий ва барча мухлисларга қўллаб-қувватлаганликлари учун раҳмат айтмоқчиман. Мен ўйнамаган пайтларимда Анчелотти доим мен билан гаплашиб, сабрли бўлишни, ишлашда давом этишимни маслаҳат берарди, кейин менинг вақтим келади", — деди Гюлер.
Бунгача туркиялик футболчи кетма-кет учта ўйинда тўртта гол урганди.
Эслатиб ўтамиз, 19 ёшли Арда Гюлер ўтган ёзда "Фенербахче"дан "Реал"га ўтган эди. "Лос Бланкос"да бу мавсумда яна иккита ўйин бор. 25 май куни улар ўз майдонида "Реал Бетис"ни қабул қилса, 1 июнь куни "Уэмбли"да Чемпионлар лигаси финалида Дортмунднинг "Боруссия" жамоаси билан учрашади.
