"Айнтрахт" марказий ҳимоячиси Макото Хасебе Германия Бундеслигасининг 2023/2024 йилги мавсумидан сўнг футболчилик фаолиятини якунлади, дея хабар беради Франкфурт клуби матбуот хизмати.
Бундеслиганинг 34-туридан ўрин олган баҳсда "Айнтрахт" ўз майдонида "Лейпциг"ни қабул қилди ва бу япониялик ҳимоячи учун франкфуртликлар таркибидаги охирги ўйин бўлди.
40 ёшли Хасебе 2014 йилнинг ёзида Франкфуртнинг "Айнтрахт"ига кўчиб ўтганди. Жамоада деярли 10 йил давомида у франкфуртликлар сафида 304 та ўйин ўтказишга муваффақ бўлди, бу ўйинларда у иккита гол урди ва олтита голли узатмани амалга оширди.
