АҚШнинг Сан-Диего шаҳрида профессионал бокс оқшоми бўлиб ўтди.

Унда америкалик боксчи, Токио-2020 Олимпия ўйинлари совриндори Ричард Торрес ҳам рингга кўтарилди. Унга ҳамюрти Брэндон Мур рақиблик қилди. Жанг бешинчи раундда якунланди. Торрес рақибини оғир зарбаси орқали нокдаун ҳолатига туширди, кейинроқ эса рефери жангни тўхтатди.

Бу орқали Торрес проф боксдаги ўнинчи жангини ҳам муддатидан олдин ғалаба билан якунлади. Мур эса ўзининг 15-жангида илк бор мағлубиятини қабул қилиб олди.

Эслатиб ўтамиз, Баҳодир Жалолов ва Ричард Торрес ҳаваскор боксда икки бор тўқнаш келган ва ҳар икки жангда ҳамюртимизнинг қўли баланд келган. Токио-2020 Олимпиадаси финалида Жалолов Ричард Торресни очколар ҳисобига кўра мағлубиятга учратганди.