Суперлига 10-турида ўз майдонида "Олимпик" билан дуранг ўйнаган "Навбаҳор" клуби устози Самвел Бабаян ўйин ҳақида ўз фикрини билдирди.

Ҳамма бизга қарши алоҳида тайёргарлик билан ўйнайди. Ҳамма "Навбаҳор"дан очко тортиб олишни истайди. Ҳамма бизни ёқтирмайдиган даражада асаббузар жамоага айландик. Аммо, дадил айтишим мумкинки, бугун "Навбаҳор" чемпионатдаги энг яхши ўйинини ўтказди. Бугун рақибни ҳар жабҳада енгдик. Кўплаб ҳужумлар ва ҳавфли вазиятлар уюштирдик. Аммо, тўп негадир дарвозага киргиси келмади. Футболчиларга раҳмат, улар қаттиқ меҳнат қилишди.

Искандеровда камида учта гол уришга имконият бўлди. Шунчаки, омад келмади дея оламан. Табатадзенинг ўрнига майдонга тушган Шодибоев ҳам ёмон ўйнамади. Бизни ҳамма кучли ва тажрибали ўйинчиларни йиғиб олган дейишади. Аммо, Табатадзенинг ўрнида ҳаракат қилган Шодибоев эндигина 17 ёшда эканлиги, бу фикр нотўғрилигини кўрсатмоқда. Биз ёш футболчиларга ҳам шундай ишонч билдираяпмиз.

Футболчиларга ишонаман. Ҳали чемпионат давом этмоқда ва натижа кўрсатишимизга ишонаман. Бунга бизда салоҳият этарли. Шунчаки, барча ўйинларда ҳам омад келмаяпти. Яхши ўйнаб туриб ҳам ғалаба қозона олмаслик мумкин. Буни бир неча бор кўрдик.