Россия терма жамоасининг собиқ мураббийи Станислав Черчесов Қозоғистон терма жамоасининг янги бош мураббийига айланади. Бу ҳақда журналист Иван Карпов хабар бермоқда.

Манбага кўра, Черчесов тез орада музокараларнинг якуний босқичи учун Остонага учади. 60 ёшли мутахассис Қозоғистонда йилига 1,2 миллион евро маош олади, шартнома муддати кўрсатилмаган.

Аввалроқ, 2022 йилнинг апрелидан буён терма жамоани бошқарган Магомед Адиев Қозоғистон терма жамоасини тарк этганди. Қайд этилишича, айнан Адиев терма жамоанинг янги бош мураббийи лавозимига Черчесовни тавсия қилган.

Черчесов ўтган йилнинг июль ойидан бери ишсиз эди, ўшанда у Венгриянинг "Ференцварош"дан ҳайдалган эди. 2016 йилдан 2021 йилгача у Россия терма жамоасини бошқарган ва уни ўз уйидаги жаҳон чемпионатининг чорак финалига олиб чиққан.

Черчесов шунингдек, "Спартак", "Жемчужина-Сочи", "Терек", "Амкар", "Динамо Москва" ва Варшаванинг "Легия" клубларида ишлашга муваффақ бўлди.