"Челси" дарвозабони Роберт Санчес "аристократлар"нинг янги бош мураббийи Энцо Марескага ёқади, дея хабар беради инсайдер Фабрицио Романо.
3 июнь куни "Челси" бош мураббийи этиб тайинлангани эълон қилинган 44 ёшли италиялик мутахассис Лондон клуби директорлар кенгашига жамоанинг испаниялик дарвозабони Роберт Санчесни ёқтиришини ва у билан ҳамкорлик қилишни интиқлик билан кутаётганини айтди.
Маресканинг фикрича, 2023 йилнинг ёзида "Брайтон"дан Лондон клубига ўтган ва 2030 йилнинг ёзигача шартнома имзолаган 26 ёшли дарвозабон фаолиятидаги янги босқичга тайёр.
Клуб раҳбарияти футболчининг кейинги мавсумда ҳам жамоада қолишини кутмоқда.
Аввалроқ, Football London "Челси" "Валенсия" дарвозабони Гиорги Мамардашвилига қизиқиш билдираётгани, шунингдек, Лондон клуби 2023/24 йилги мавсумда "Реал Мадрид"да ижара асосида ўйнаган Кепа Аррисабалагани сотмоқчилиги ҳақида хабар берган эди.
2023/24 йилги мавсумда Роберт Санчес "аристократлар" сафида 21 та ўйин ўтказиб, 5 тасида ўз дарвозаси дахлсизлигини сақлаб қолган.
