Мадриднинг “Реал” клуби ҳужумчиси Винисиус Жуниор ўтган йили бразилиялик футболчини ирқий ҳақорат қилган “Валенсия” мухлисларининг қамоқ жазосига муносабат билдирди.

10 июнь куни “Валенсия”нинг уч нафар мухлиси Винисиусни ҳақорат қилгани учун саккиз ойлик қамоқ жазосига ҳукм қилингани маълум бўлди.

"Кўпчилик мендан бунга эътибор бермасликни сўрашди, кўпчилик менинг курашим беҳуда кетаётганини ва шунчаки "футбол ўйнашим" кераклигини айтишди.

Лекин ҳар доим айтганимдек, мен ирқчилик қурбони эмасман. Мен ирқчиларнинг жаллодиман. Испания тарихидаги бу биринчи жиноий ҳукм мен учун эмас. Бу барча қора танлилар учун.

Бошқа ирқчилар қўрқсин, уялсин ва сояда яширинсин. Aкс ҳолда мен шу ердаман. Ушбу тарихий жараёнда ёрдам бергани учун Ла Лига ва "Реал Мадрид"га раҳмат. Яна кўп бўлади", — деб ёзган Винисиус ўзининг ижтимоий тармоқдаги саҳифасида.

Мадриднинг “Реал” клуби Ла Лиганинг 2022/23-йилги мавсумининг 35-турида “Валенсия”га сафарда мағлуб бўлди (0:1). Учрашув давомида Винисиус уй мухлислари томонидан бир неча бор ирқчиликка учраган. Шу боис иккинчи бўлимда учрашув тўхтатилганди.

Ўйиндан сўнг “Реал” футболчининг ҳақоратлари учун прокуратурага ариза берди.