Криштиану Роналду Ирландия терма жамоасига (3:0) қарши ўйиндаги дублидан сўнг фикр билдирди.

"Миллий терма жамоа учун ҳар бир гол алоҳида. Келиб, ўйнаб, гол ура олганимдан жуда хурсандман, лекин асосий мақсад ғалаба қозониш ва яхши футбол кўрсатиш.

Жамоа яхши ҳимояланди, бизда жуда яхши динамика бор эди. Ўйнаган барчани табриклайман, жамоамиз айнан шундай ҳаракат қилиши керак. Бизни ҳар доим иштиёқ билан қўллаб-қувватлайдиган мухлисларга ҳам раҳмат айтмоқчиман, бу кўп нарсани англатади.

Мен Хорватия билан ўйинни ўтказиб юборишга тайёр эдим, мураббий мени огоҳлантирди. У бир ҳафта дам олишимни хоҳлади, мен ўйнамаслигимни билардим. 6 июн куни машғулотларни бошладим ва бугунги ўйинга тайёргарлик кўришим керак эди. Энг муҳими 18 июндан бошланади. Биз еврони иложи борича яхшироқ бошлашни истаймиз", деди португалиялик форвард.