Хорватия терма жамоаси ҳимоячиси Йошко Гвардиол ўз терма жамоаси Евро-2024да "ўлим гуруҳи"дан жой олгани ҳақида гапирди. Эслатиб ўтамиз, хорватлар гуруҳ босқичида Италия, Испания ва Албания билан ўйнайди.

"Бу қийин гуруҳ ва энг муҳими, биз буни жуда яхши тушунамиз. Анъанага кўра Испанияга қарши ўйнаш биз учун қийин. Лекин испанлар билан учрашиш ҳам катта шараф, чунки улар ажойиб футбол халқи. Улар бутун ўйин давомида тўпга эгалик қилишлари билан машҳур. Худди шу нарса Италияга ҳам тегишли. Улар, шубҳасиз, юқори сифатли жамоага эга. Ўйлайманки, ҳар бир ўйин учун рецептимиз шуки, биз вазиятни назорат қилиб, ташаббусни ўз қўлимизга олишга ҳаракат қиламиз. Биз тўпни назорат қилишимиз керак, чунки усиз шунчаки мақсадсиз югуришга ҳаракат қилсак, асосий мақсадга эришишимиз қийин бўлади", - деди Гвардиол УЕФА расмий сайтига.