Мадриднинг «Реал» клуби ва Испания терма жамоаси ҳимоячиси Даниэль Карвахаль 2024/2025 йилги мавсум охирида «Қироллик клуби»ни тарк этиши мумкин. Бу ҳақда "AS" хабар бермоқда.
Манбага кўра, клуб ҳалигача ҳимоячи билан келаси йилнинг ёзида тугайдиган шартномани узайтиргани йўқ, шунинг учун Карвахаль билан келишувга эришилмаса, эҳтимолий вариантларни кўриб чиқмоқда. Қайд этилишича, раҳбарият «ПСЖ»дан марокашлик футболчини Ашраф Ҳакимийни Мадрид клубига қайтариш учун алоқага эга. "Лос-Бланкос" қисқа рўйхатидаги иккинчи вариант - «Челси» сардори Рис Жеймс.
Эслатиб ўтамиз, Карвахаль «Реал Мадрид» тарбияланувчиси ҳисобланади. Ўтган мавсумда у клуб сафида барча турнирларда 41 та ўйинда майдонга тушиб, 6 та гол ва 5 та голли узатмага муаллифлик қилган.
