Daily Mail'нинг ёзишича, "Челси" "Ньюкасл" ҳужумчиси Александр Исак билан шартнома имзоламоқчи.

Манбанинг хабар беришича, клублар 24 ёшли швед футболчисини трансфер қилиш бўйича ўзаро музокаралар олиб боришган. "Аристократлар" Исакни имзолаш учун Моисес Кайседо учун 115 миллион фунт стерлинглик трансфер рекордини янгилашларига тўғри келишини тушунишади.

Қайд этилишича, "Челси" ҳужумчи позицияси учун фаол тарзда номзод изламоқда. "Астон Вилла"дан Жон Дуран, "Лилль"дан Жонатан Дэвид, "Хоффенхайм"дан Максимилиан Байер билан шартнома имзолашга уринишлар бўлди.

Шунингдек, ёзги трансфер ойнасидаги вазифалар орасида вингер сотиб олиш ҳам бор.

Исаак ўтган мавсумда 40 та ўйинда 25 та гол урган ва 2 та голли узатмани амалга оширган.