Ўзбекистон Суперлигасининг 13-туридан ўрин олган баҳсни жамоамиз Қаршида “Насаф” клубига қарши ўтказади. Мазкур жамоалар шу кунгача миллий чемпионатларимиз тарихида ўзаро 54 марта рўбарў келишган.

Ушбу ўйинларнинг 23 тасида “аждарлар”нинг қўли баланд келган бўлса, 14 та учрашувда “лочинлар” ғалаба қозонишган,  17 та баҳсда эса жамоалар муроса кўчасини танлашган. Тўплар нисбати – 80-67, “Насаф” фойдасига.

Ўзаро учрашувларда “Насаф” 86 очкони,  “Навбаҳор” эса 59 очкони қўлга киритган.

Ушбу клублар ўртасидаги ўйинлардаги энг йирик - 6:0 ҳисоби Наманган ва Қаршида қайд этилган.

“Насаф” ҳамда “Навбаҳор” жамоалари бунгача Қаршида 27 марта куч синашишган. Мазкур баҳсларнинг 18 тасида қаршиликлар зафар қучишган бўлса, 4 та учрашувда дуранг қайд этилган, 5 та ўйинда эса наманганликлар ғалаба қозонишган.

Қаршида ўтказилган ўзаро учрашувларда “аждарлар” “Навбаҳор” дарвозасини 54 марта ишғол этишган бўлса, “лочинлар” “Насаф” дарвозасига  24 та тўп киритишган.

Таъкидлаш жоизки, “Навбаҳор” сўнгги 6 йилдан буён Қаршидан очко билан қайтмоқда. 2018, 2020 ва 2023 йилларда “лочинлар” дурангга эришган бўлишса (1:1, 2:2, 0:0), 2019, 2021 ҳамда 2022 йилларда жамоамиз Қаршидан  1:0 ҳисобидаги ғалаба билан қайтганди.

Эслатиб ўтамиз, “Насаф” – “Навбаҳор” учрашуви 30 июнь куни Қаршидаги “Марказий” стадионида соат 20:00 да бошланади.

“Навбаҳор” ПФК матбуот хизмати.