Туркия терма жамоаси бош мураббийи Винченцо Монтелла Европа чемпионати-2024 1/8 финали ўйини арафасида Австрия терма жамоасига қарши ўйин ҳақида гапирди. Эслатиб ўтамиз, австрияликлар гуруҳда биринчи ўринни эгаллаган эди.
"Австрия D гуруҳида биринчи ўринни эгалладими? Бу мувозанатли гуруҳ бўлиб, бир-бирига яқин рақиблар бор эди, шунинг учун учтадан ҳар қандай жамоа етакчи бўлиши мумкин эди. Австриянинг ғалабаси мен учун кутилмаган бўлгани йўқ.
Австрия жуда шиддатли, ўтишларда анча тажовузкор ва жисмонан жуда кучли. Бу жисмоний устунликка эга жамоа. Бизда иккита муҳим рақам етишмаяпти, лекин биз бу бўшлиқларни турли йўллар билан тўлдирамиз. Биз майдонда ҳам, майдон ташқарисида ҳам оғир дамларни бошдан кечирдик ва қўлимиздан келган барча ишни қиламиз", - деди Монтелла УЕФА матбуот хизматига.
Австрия терма жамоаси билан ўйин 2 июль, сешанба куни бўлиб ўтади.
