Тўрт карра НБА чемпиони Леброн Жеймс "Лос-Анжелес Лейкерс" билан янги шартномага рози бўлди. Бу ҳақда ESPN хабар бермоқда.

39 ёшли Жеймс бу ёзда эркин агентга айланиши мумкин. Янги келишув муддати икки йил, шартнома суммаси 104 миллион долларни ташкил этди.

Шу тариқа, Жеймс 19 ёшли ўғли Бронни билан бир жамоада ўйнаши мумкин бўлади, уни июнь ойида «Лейкерс» чақириб олган.

Ўтган мавсумда «Лейкерс» биринчи босқичда «Денвер»га ютқазиб, НБА плей-офф босқичидан чиқиб кетганди.

2018 йилдан бери «Лейкерс» сафида ўйнаётган ЛеБрон Жеймс тарихдаги энг яхши баскетболчилардан бири саналади.

У тўрт карра НБА чемпиони (иккитаси Майами билан, биттадан Кливленд ва Лейкерс билан), тўрт карра НБА финалининг энг яхши ўйинчиси ва тўрт карра НБАнинг энг қиммат ўйинчиси. Баскетболчи АҚШ терма жамоаси таркибида иккита Олимпия олтин медалига эга (2008, 2012). У Парижда бўлиб ўтадиган Олимпиадада АҚШ терма жамоаси сафида ўйнайди.