Португалиялик ҳужумчи Криштиану Роналду Словения билан ўйинда юрак уриши ҳақидаги маълумотлар эълон қилинганидан кейин "паразит маркетинг" учун жазоланиши мумкин.

The Sun нашри хабарига кўра, 39 ёшли ҳужумчи WHOOP фитнес компанияси билан ҳамкорлик қилгани учун 2024 йилги Европа чемпионатининг қолган ўйинларидан дисквалификация қилиниши мумкин. Компания Криштианунинг юрак уриши ҳақидаги маълумотларни жойлаштирди ва шу тариқа турнир билан ҳомийлик шартномасига эга бўлмаган ҳолда ўз маҳсулотини Европа чемпионатига боғлашга ҳаракат қилди. Вазият бўйича қарор ҳали қабул қилинмаган. Европа чемпионатида Роналду тўртта ўйин ўтказиб, битта голли узатмани амалга оширди.