А Серия клублари еврокубоклардан четлаштирилиши мумкин, деб хабар беради La Repubblica нашри. Бундан ташқари, Италия Евро-2032 мезбонлик қилиш ҳуқуқидан маҳрум қилиниши мумкин.
Манбага кўра, УЕФА ва ФИФАнинг бундай жазоси Италиянинг ўнг қанот партияси аъзоси Жоржо Муленинг "Спорт тўғрисида"ги Фармонни қабул қилиш таклифи билан чиққани сабабли юзага келиши мумкин, бу эса футболчиларга спорт судлари орқали эмас, балки бевосита биринчи инстансия маъмурий судларига апелляция бериш имконини беради. Бундан ташқари, ушбу ҳужжат Италия лигаларига маҳаллий футбол федерациясидан (FIGC) тўлиқ мустақиллик беради.
УЕФА ва ФИФАнинг фикрича, бундай Фармоннинг қабул қилиниши мамлакат расмийларининг спортга аралашувини англатади. Таъкидланишича, ушбу ташкилотлар аллақачон Италия футбол федерациясига хат жўнатган ва унда Муленинг футбол тизимига оид таклифларининг зарари қайд этилган. УЕФА ва ФИФА, шунингдек, Муленинг тузатишлари маъқулланса, улар FIGC фаолиятини тўхтатиб қўйишгача бўлган чораларни кўришга мажбур бўлишларини таъкидладилар.
