Канада терма жамоаси бош мураббийи Жесси Марш АҚШ терма жамоасини бошқаришдан манфаатдор эмаслигини айтди.

Қўшма Штатлар Грегг Берхалтер истеъфога чиқарилганидан сўнг янги мураббий қидирмоқда - унинг қўл остидаги жамоа турнир мезбони бўлган бўлса-да, Америка кубогининг гуруҳ босқичидан ўта олмади.

"Мен бу ишни тарк этмайман ва АҚШ жамоасида ишлашга қизиқмайман. Тўғрисини айтсам, агар у ерда катта ўзгаришлар бўлмаса, келажакда бу ишга ҳеч қачон қизиқмайман, деб ўйлайман.

Мен Канада жамоасида жуда бахтиёрман, бу раҳбарият ва жамоа билан ишлаш менга жуда ёқади", - деди Марш.

АҚШда бўлиб ўтаётган Америка кубогида Канада терма жамоаси ярим финалга қадар етиб борган ва у ерда Аргентинага имкониятни бой берган (0:2) ва энди 3-ўрин учун ўйинда Уругвай билан ўйнайди.