"Севилья"нинг собиқ аъзоси украиналик Евгений Коноплянка футболчилик фаолиятини якунлагани ҳақида хабар берган эдик. Бу ҳақда футболчи ўз фикрлари билан ўртоқлашди. 

"Бугун мен сизлар билан жуда муҳим нарсани баҳам кўраман. Мен учун футбол шунчаки ўйин эмас, шунчаки спорт ёки мусобақа эмас.

Бу мени шахс сифатида ва профессионал инсон сифатида кимлигимнинг кўрсатиб турувчи катта восита ҳамдир.

Мен бу ўйинни жуда яхши кўраман ва футбол майдонида бошдан кечирган ҳар бир лаҳзани қадрлайман.

Аммо бугун сизга маълум қилишим керакки, мен профессионал фаолиятимни якунлашга қарор қилдим. Шу боис, мен билан шу йўлни босиб ўтган барчага, ғалабалар қувончи ва мағлубият қайғусини мен билан баҳам кўрган барчага, мени кузатиб, майдонда ва ундан ташқарида қўллаб-қувватлаган барчага раҳмат айтаман", — деди 34 ёшли Коноплянка Instagram'да.