“Андижон” ва “Янгиер” жамоалари ўртасидаги учрашув якунланганидан сўнг андижонликлар устози Азамат Абдураимов ўйин тўғрисида ўз фикрини билдирди.

— Ўйиндан қониқиш ҳосил қилдим дея олмайман. Айниқса, биринчи бўлимда ўйинимиз қовушмади. Танаффусда эса футболчиларга ўзларини қўлга олишларини айтдим. Умуман, бугун биз 4-4-2 тактикасини қўллаб, Темур Ҳакимовни олдинги чизиққа қўйдик. Иккинчи бўлимда ўйинимиз яхши чиқди. Яна стандарт вазиятларидан самарали фойдаландик. Иккала гол ҳам бурчакдан тўп узатилгач киритилди. Албатта, уч очкони қўлга киритиб кетма-кет тўртинчи ғалабага эришдик. Лекин шуни айтишим керакки, футболчилар биринчи лигада иштирок этяпмиз ва бир оёқда ғалаба қозонамиз деб ўйлашса хато қилишади. Чунки бизга қарши ўйинларда жамоалар ҳимоявий тактикада тўп суришмоқда. Шундай бўлса-да, сафардаги ўйинларимиз осонроқ ўтади деб ўйлайман.

Узоқ танаффусдан кейин майдонга қайтган Раҳим Қодиров ёмон ҳаракат қилмади. Тўғри, у ҳали анча пайт ўйнамагани боис юқори спорт формасида эмас. Лекин унга ҳам имкон бериб турсак, аввалги ҳолатига қайтиши мумкин.