Марокаш терма жамоаси сардори Ашраф Ҳакими Аргентина терма жамоасига қарши Олимпиада турнири тўхташ вақтида майдонга югуриб чиқиб, бегона нарсаларни улоқтирган мухлисларнинг хатти-ҳаракатларини қоралади.
Марокашлик мухлислар томонидан юзага келган тартибсизликлар туфайли ҳакам Сент-Эьтендаги стадиондаги ўйинни тўхтатди. Натижада ўйин икки соатдан сўнг трибунада томошабинларсиз якунланди. Шу билан бирга, ўйин қайта бошланишидан олдин ҳакам аргентиналикларнинг голини офсайд туфайли бекор қилди ва бу марокашликларга 2:1 ҳисобида ғалаба қозониш имконини берди.
"Олимпиада ўйинларини муҳим ғалаба билан бошладик. Баъзи мухлисларнинг ўйин давомида содиқ мухлисларимиз обрўсига доғ туширган хатти-ҳаракатларидан афсусдаман. Бундай хатти-ҳаракатларга футболда ўрин йўқ", — деб ёзди Ҳакими ижтимоий тармоғидаги саҳифасида.
