Испания Ла Лигаси тўловлар кечикиши ва қарзлар туфайли "Телеспорт" билан ўйинларни трансляция қилиш бўйича шартномани бекор қилди. Бу ҳақда "РБК" хабар берди.
Манбага кўра, Ла Лиганинг "Телеспорт" билан шартномаси муддатидан олдин бекор қилинишига компания бош директори ва асосий бенефисиар Петр Макаренко томонидан молиявий мажбуриятларни бузгани сабаб бўлган. Ҳозирда у уй қамоғида. Қайд этилишича, тўловлар кечиктирилган ва қарзлар йиғилиб қолган. Натижада, Ла Лига бошқа шерик қидира бошлади ва ўйинларни трансляция қилиш ҳуқуқини Россиянинг "Матч ТВ" телеканалига сотди.
Аввалроқ "Матч ТВ" кейинги етти йил давомида испан футболини трансляция қилишини эълон қилган эди. Шартнома Испания иккинчи дивизиони, мамлакат кубоги ва Суперкубоги учрашувларини трансляция қилиш ҳуқуқини ўз ичига олади.
