Ўзбекистон миллий жамоаси ва “Навбаҳор” клуби дарвозабони Ўткир Юсупов фаолиятини Эронда давом эттиради. Transfermarkt маълумотига кўра, “Фулад” 33 ёшли посбон учун Наманган клубига 300 минг евро тўлаган.

Юсупов 2019 йилдан бери “Навбаҳор” сафида ҳаракат қилиб келганди. Жорий мавсум дарвозабон Суперлиганинг 13 та турида майдонга тушиб, 5 та ўйинда ўз дарвозасини дахлсизлигини сақлаб қолган. Шунингдек, у “Машъал”, “Насаф”, “Нефтчи” ва “Қўқон-1912” клубларида ҳам фаолият юритган.

Маълумот ўрнида, Ўткирнинг янги жамоаси “Фулад” ўтган мавсумда Эрон чемпионатида 11-ўринни эгаллаган.