Грузиялик Нино Салуквадзе ўз фаолиятидаги ўнинчи Олимпиадасида қатнашиб, канадалик чавандоз Ян Милларнинг рекордини такрорлади.

55 ёшли Салуквадзе 27 июль куни 10 метр масофага пневматик тўппончадан ўқ отиш бўйича саралаш босқичида қатнашиб, 44 нафар иштирокчи орасида 38-ўринни эгаллаб, финалга чиқа олмади.

Салуквадзе биринчи марта 1988 йилда СССР терма жамоаси таркибида Олимпия ўйинларида қатнашган.

Ўшанда у 25 метрга тўппончадан ўқ отиш баҳсларида олтин, шунингдек, 10 м масофа бўйича кумуш медални қўлга киритган, 2008 йилда Пекинда бўлиб ўтган ўйинларда Салуквадзе 10 метрга ўқ отишда бронза медалини қўлга киритган.