Тошкентда ўқув-машғулот йиғинини ўтказаётган Ўзбекистон U-20 ёшлар терма жамоаси 17 апрель куни Тошкентнинг «Бунёдкор» клуби ёшлари билан назорат учрашувини ўтказди ва 2:0 ҳисобида ғалаба қозонди.

Айни дамда Тошкентда йиғин ўтказаётган Ўзбекистон ёшлар терма жамоаси 17 апрель куни Тошкентдаги «ЖАР» стадионида Ўзбекистон Биринчилиги баҳсларида иштирок этадиган «Бунёдкор-2» клубига қарши назорат учрашувини ўтказди. Ўйиннинг 14-дақиқасида терма жамоа сафида кўрикдан ўтаётган футболчилардан бири Шоҳназар Норбеков ҳисобни очди. 40-дақиқада Адбул Азиз Юсупов «Бунёдкор» дарвозасини иккинчи бор нишонга олди - 2:0. Ушбу ҳисоб ўйин якунигача ўзгармади ва ёшлар терма жамоасига ғалаба келтирди.

Аҳмаджон Мусаев бош мураббийлигидаги Ўзбекистон ёшлар терма жамоаси (U-20) айни пайтда Тошкентда навбатдаги йиғинини бошлади. Аввалроқ хабар берганимиздек, Ўзбекистон ёшлар терма жамоаси 20 апрель куни Португалияга жўнаб кетади ва у ерда Португалия ёшлар терма жамоаси билан иккита ўртоқлик учрашувини ўтказади. Тошкентдаги йиғин 19 апрель кунигача давом этади.

Португалия йиғинига жўнаб кетадиган Ўзбекистон ёшлар терма жамоасининг таркиби:
Дарвозабонлар: Асилбек Аманов, Акмал Турсунбоев.
Ҳимоячилар: Жавлон Мирабдуллаев, Азамат Абдуллаев, Максимильян Фомин, Тохиржон Шамсиддинов, Муҳсинжон Убайдуллаев, Сардор Рахмонов, Бобурбек Йўлдошев;
Ярим ҳимоячилар: Абдулло Олимов, Шоҳназар Норбеков, Аббосбек Махсталиев, Сардор Собирхўжаев, Сергей Рекун, Жалолиддин Машарипов;
Ҳужумчилар: Забихилло Ўринбоев, Тимур Хакимов, Абдул Азиз Юсупов.

Эслатиб ўтамиз, Ўзбекистон U-20 ёшлар терма жамоаси шу йилнинг ёз ойида Туркияда бўлиб ўтадиган ёшлар ўртасидаги жаҳон чемпионатида иштирок этади.