“Шўртан” – “Қизилқум” учрашувидан сўнг матбуот анжуманида иштирок этган Эдгар Гесс, жамоасининг ўйини яхши чиқмаганини ҳаяжон ва натижанинг босими билан изоҳлади.

Эдгар Гесс (“Шўртан” бош мураббийи):
“Мусобақа жадвали нуқтаи назаридан ҳар иккала жамоа учун бугун уч очко муҳим эди. Шу сабабли дастлабки бўлим жуда ҳаяжонли тарзда ўтди. Биринчи бўлимда рақиб яхши жамоа эканини кўрдик. Рақибда ҳам, бизда ҳам вазиятларлар бўлди. “Қизилқум” ўйинни назорат ҳам қила олди. Бизда эса ҳаяжон кучли бўлди. Эътибор берган бўлсангиз, ҳисоб очилгач ортиқча босимдан халос бўлдик ва йигитларим анча яхши ўйнай бошлашди.

Дастлабки бўлимда ҳисобни оча олмаганимизга сабаб, айтганимдек, ҳаяжон ва босим таъсир қилди. Вазиятлар содир этилмоқда, аммо голлар кам урилмоқда.
 
“Шўртан” сўнгги йилларда мавсумни ёмон бошлаши одатга айланиб қолгани рост, аммо футбол фақат машғулотлардан иборат эмас. Футбол жуда катта ташкилотдир. Унда фақат футболчилар эмас, мураббийлар, мухлислар ва бошқалар иштирок этишади. Агар биз барчамиз бирлаша олсак, бу йилги мавсумда ҳам юқори ўринларга эга бўламиз”.