"Валенсия" "Ливерпул"га ўтиш арафасида турган 23 ёшли дарвозабон Гиорги Мамардашвилининг ўрнига янги дарвозабон қидиришни бошлади. Бу ҳақда Football Espana нашри хабар бермоқда.
Манбанинг хабарига кўра, "Валенсия" ва "Ливерпуль" 35 миллион евролик трансфер бўйича келишиб олишган, Мамардашвили инглиз клубига ўтиш имкониятидан хурсанд.
Олдинроқ грузиялик дарвозабон "мерсисайдликлар" таклиф қилган шартнома шартларини аллақачон қабул қилгани ҳақида хабар берилганди.
Мамардашвилининг испан клуби билан шартномаси 2027 йилнинг ёзига қадар мўлжалланган. Ўтган мавсумда дарвозабон 32 та ўйинда майдонга тушиб, 12 тасида ўз дарвозаси дахлсизлигини сақлаб қолган, қолганларида эса 34 та гол ўтказиб юборган. Transfermarkt порталида берилган маълумотларга кўра, футболчининг бозор қиймати 45 миллион еврони ташкил қилади.
