Ҳаммани ҳайратда қолдириб, "Ливерпул"ни тарк этганидан уч ой ўтгач, Юрген Клопп яна бош мураббий бўлади, аммо алоҳида воқеа учун.
Немис мураббийи Дортмунднинг “Боруссия” клубининг икки афсонаси Лукаш Пишчек ва Якуб Блашчиковскининг хайрлашув учрашувида пайдо бўлади. Бу ҳақда “арилар” ижтимоий тармоқлардаги видеода эълон қилди.
Суҳбат аввалида польшалик футболчилар ўзларига мураббий кераклигини айтишади. У мураббий Клопп бўлиб чиқади.
Клопп қайси жамоани бошқариши унга аҳамияти йўқлигини айтди: "Менга фарқи йўқ. Мен бу ҳақда умуман ташвишланмайман. Олдин қилган ишни қиламан: ўйин бошланишидан беш дақиқа олдин бу ҳақда ўйлай бошлайман".
Пишчек ва Блашчиковски ўртасидаги хайрлашув учрашуви 7 сентябрь куни Дортмунддаги "Сигнал Идуна Парк" стадионида бўлиб ўтади.
Эслатиб ўтамиз, Юрген Клопп "Боруссия"ни етти йил бошқарган. Бу вақт ичида у клубни кетма-кет икки марта Германия чемпионлиги, шунингдек, икки марта Суперкубок ва бир марта Германия кубоги соҳибига айлантирди.
