Италиянинг “Аталанта” клуби ҳужумчиси Адемола Лукман Франциянинг “ПСЖ” клуби футболчисига айланиши мумкин, дея хабар бермоқда журналист Никола Шкира.
Манбага кўра, нигериялик форвард парижликлар билан йилига 5 миллион евро маош оладиган беш йиллик шартномага келишиб олган. Қайд этилишича, Лукман "Аталанта"да 1,8 миллион евро ишлаб олади. "ПСЖ" раҳбарияти Италия клуби учун биринчи трансфер таклифини тайёрламоқда.
26 ёшли ҳужумчи 2022 йилнинг августидан буён "Аталанта"да тўп тепмоқда. Бу вақт ичида Бергамо жамоасининг барча турнирларда 79 та учрашувида қатнашиб, 32 та гол урди ва 18 та голли узатмани амалга оширди.
Лукман аввалроқ “Чарлтон”, “Эвертон”, “Лестер”, “Фулхэм” ва “РБ Лейпциг” клубларида ҳам ўйнаган.
