Суперлига 14-турида «Сўғдиёна» жамоаси Фарғонада «Нефтчи» клуби меҳмони бўлди ва 3:0 ҳисобидаги йирик ғалабани қўлга киритди. Беллашувдан сўнг жамоа бош мураббийи Иван Бошкович матбуот анжуманида иштирок этди.

— Ўйлашимча, рақибга яхши тайёргарлик кўрдик. Биз майдоннинг ҳолатини ҳам ҳисобга олган эдик. Айниқса, иккинчи таймда. Бугун жанг бўлишини, иккинчи қават ва стадартларни ҳисобга олган эдик. Йигитларим барчасини уддалашди. Мени талабимдан ташқари, руҳий холатимиз ва сабр билан кутганимиз учун ҳақли ғалабага эришдик. Рақибга кейинги ўйинда ғалаба тилайман.

— Бошкович тунгги соат 2-3 ларда стадионда янги тактика устида бошқотириш учун айланиб юради деб эшиттим. Шу ростми?

— Барчаси сиз ўйлагандек эмас, аммо ҳақиқатга яқин. Биз деярли базадан чиқмай ишлаяпмиз. Бундай пайтда сайр қилиш учун майдон энг яқини. Тактика борасида ухлаётганимизда ҳам ўйлайман. Бундай савол берганингиз менга ёқди.

— «Нефтчи» билан кубокда ҳам, чемпионатда ҳам ўйнадингиз. Ўзгариш борми?

— Бу батамом икки хил учрашув бўлди. Бизда ҳам, уларда ҳам имконият бўлган эди. Бу сафар асосий кураш марказда кечди. Биз кўпроқ тўп назоратини рақибга бериб ҳаракат қилдик. Икки ўйинни солиштириб бўлмайди. Ҳар бир баҳснинг ўз сценарийси бор. Мавсум охирида ҳаммаси ўз ўрнига келади. Турнир жадвали ҳамма саволларга якуний жавобни беради.

— Бугун жуда кўп ёш футболчилар майдонда ҳаракат қилди?!

— Нафақат бу ўйин, бошқа баҳсларда ҳам бу холат кузатилади. Жамоада жисмоний чарчоқ йиғилиб қолгани учун кўпроқ ротацияга мурожаат этамиз. Шунчаки, ёшлар машғулотларда катталардан кўра яхшироқ ҳаракат қилмоқда. Мен ҳеч қачон иккисини ажратмаганман. Уларнинг формасига эътибор қиламиз. Ўтган баҳсда 6 та 21 ёшдан кичик футболчи билан ҳаракат қилган эдик. Бугун 5 та. Мен ёшга эътибор қилмайман. Ҳар бир беллашувга бир хил таркиб билан ҳаракат қилиб бўлмайди. Энг оптимал таркибни танлаш керак. Бу 11 футболчи билан жамоа доим энг кучлиси бўлиб қолмайди. Бошқа факторлар ёрдамида балансни ушлаб туриш керак.